काठमाडौं । प्रतिनिधिसभा र प्रदेशसभा निर्वाचनको क्रममा मतदान रोक्ने प्रयास भएपछि प्रहरीले पाँच जिल्लामा गोली चलाएको छ ।
नेपाल प्रहरीका केन्द्रीय प्रवक्ता डीआईजी टेकप्रसाद राईका अनुसार रौतहट, सिराहा, चितवन, दोलखा र बाजुरामा गोली चलेको हो ।
मतदान रोक्ने प्रयास र झडपको स्थिति सृजना भएपछि प्रहरीले स्थिति नियन्त्रणमा लिनका लागि गोली चलाएको डीआईजी राईले बताए ।
उनका अनुसार देशभर २७ ठाउँमा मतदान स्थगित भएको छ । तीमध्ये कतिपय ठाउँको मतदान पुनः सुरु भइसकेको पनि राईले बताए ।
