निजगढमा विमानस्थल बनाउने निर्णय सर्वोच्च अदालतले गर्यो बदर


निजगढमा विमानस्थल बनाउने निर्णय सर्वोच्च अदालतले गर्यो बदर

काठमाडौँ- निजगढमा अन्तर्राष्ट्रिय विमानस्थल बनाउने गरी सरकारले गरेको निर्णय रोक्न सर्वोच्च अदालतले आदेश दिएको छ।

बरिष्ठ अधिवक्ता प्रकाशमणी शर्मा, पूर्वसचिव रञ्जुहजुर पाँडे क्षेत्री, आनन्द भण्डारी लगायतले २ वर्षअघि दिएको रिटमा फैसला गर्दै ्सर्वोच्चको बृहत् इजलासले निजगढमा विमानस्थल बनाउने गरी सरकारले गरेको निर्णय, वन मन्त्रालयको वातावरणीय अध्ययन प्रतिवेदन र  निजगढको ८ हजार ४५ हेक्टर जंगल नागरिक उड्डयन  प्राधिकरणलाई दिने निर्णय बदर गरेको हो।

प्रबक्ता विमल पौडेलका अनुसार ‘लिखित आदेश आएको छैन तर श्रीमानहरूले इजलासमा निजगढमा विमानस्थल बनाउन भनी सरकारले गरेका निर्णय उत्प्रेषणको आदेशले बदर गरि, नियमकानुन र वातावरणसम्बन्धी विधिशास्त्रीय अध्ययन गरेर उपयुक्त विकल्प खोजेर, उपयुक्त ठाउँमा अन्तर्राष्ट्रिय विमानस्थल बनाउन परमादेश जारी गरिदिएको छ भनेर बोल्नुभएको छ,’।

सर्वोच्चका न्यायाधीश हरिकृष्ण कार्की, विश्वम्भरप्रसाद श्रेष्ठ,  ईश्वरप्रसाद खतिवडा, प्रकाशमान सिंह राउत र मनोजकुमार शर्माको बृहत् पूर्ण इजलासले निजगढमा विमानस्थल बनाउने निर्णय खारेज गरी उपयुक्त अरू ठाउँ खोजेर अन्तर्राष्ट्रिय विमानस्थल बनाउन परमादेश जारी गरेको सर्वोच्चका प्रवक्ता विमल पौडेलले बताए।