एआईजी थापा भोलिदेखि काममा फर्कने


लेखक : लेखापढी      २० बैशाख २०७९, मंगलवार ०५:४८ मा प्रकाशित     
एआईजी थापा भोलिदेखि काममा फर्कने

काठमाडौं। सरकारले आइतबार मन्त्रिपरिषद् बैठकबाट नेपाल प्रहरीको महानिरीक्षक(आईजीपी) मा धिरजप्रताप सिंहलाई नियुक्त गरेपछि असन्तुष्ट बनेका प्रहरी अतिरिक्त महानिरीक्षक (एआईजीपी) सहकुलबहादुर थापा भोलि (बुधबार)बाट काममा फर्कने भएका छन् ।

सोमबार साँझ गृह मन्त्रालयमा गृहमन्त्री बालकृष्ण खाँड र गृहसचिव टेकनारायण पाण्डेलाई भेटेर आफू बुधबारबाट काममा फर्कने बताएको गृहमन्त्रीका प्रेस सल्लाहकार मधुसुदन भट्टराईले जानकारी दिएका हुन् ।

म बुधबारबाट संगठनको पूर्ववत काममा फर्कन्छु, अतिरिक्त महानिरीक्षक थापाले भने, मंगलबार सरकारी बिदा छ । बुधबार हाजिर गरेर काम सम्हाल्छु ।

उनी प्रहरीको कार्य विभाग प्रमुख हुन् । कार्य विभाग प्रमुख निर्वाचन हेर्ने प्रमुख भएकाले उनले नै प्रहरीको स्थानीय निर्वाचनको प्रमुख भएर काम गरिरहेका छन् ।

त्यस्तै उनले आइतबार आईजीपीमा सिंह नियुक्त भए लगत्तै १० दिनको विदा स्वीकृत गराएका थिए । यता आईजीपीका अर्का अकांक्षी एआईजीपी विश्वराज पोखरेलले पनि १ महिनाको विदा स्वीकृत गराएका हुन् ।

आईजीपीमा सिंहको नियुक्तलाई लिएर रुष्ट पोखरेलले सर्वोच्च अदालतमा रिट समेत दर्ता गराइसकेका छन् ।