काठमाडौं। आफुलाई सामाजिक अभियान्ता भनि चिनाउने ज्वाला संग्रौला राजेन्द्र लिङ्गदेन नेतृत्वको राष्ट्रिय प्रजातन्त्र पार्टीमा प्रवेश गरेपछि धेरैको निदहराम भएको प्रतिकृया दिएकी छिन् । उनले सामाजिक सञ्जाल मार्फत यस्तो प्रतिकृया दिएकी हुन् ।
सामाजिक सञ्जाल फेसबुकमा लामो स्ट्याटस लेख्दै उनले भनेकी छिन्, ‘म राप्रपामा प्रवेश गरेपछि धेरै मान्छेहरुको निदहराम भएको छ । म न कुनै पदको लोभले पार्टीमा प्रवेश गर्या हुँ, न त कसैको झोले बन्न नै । म त केवल एक असल राष्ट्रबादी नेता जसलाई ३० वर्षपछि यो देशले अवसरको रुपमा पाएको छ, वहॅालाई मुलुक परिवर्तनको यस यात्रामा सपोर्ट गर्न आएकी हुँ । ज-जसले मलाई आज आलोचना गरेका छन्, तिनीहरु सबै मेरै वरिपरिकै मान्छे हुन् र यो उनीहरु भित्रको डर बोलिरहेको हो । म राप्रपामा छिर्दैमा आकास खस्ने नि हैन धर्ती पल्टिने नि हैन । तसर्थ यतिसारो आतिनु पर्ने केहि छैन ।’
उनले अगाडी लेखेकिछिन्, ‘हिजोका दिनमा पनि म निस्वार्थ रुपले आफूले समाजमा सकेको योगदान दिदै आएकी मान्छे हुँ र भोलिका दिनमा पनि गर्दै जाने छु । मान्छे मारेका, बलात्कार गरेर फरार भएका र गुण्डा बनेर अरुलाई लुटेर खाएकाहरु राजनीतिमा आउन हुने तर समाजको लागि केहि राम्रो काम गरेकाहरु चाहि राजनीतिमा आउन नहुने भन्ने मान्यता नै गलत छ । फटाहा काम गरेर आएको मान्छे राजनीतिमा पनि फटाहा नै हुन्छ र असल काम गरेर आएको असल नै हुन्छ । हजारौका छोराछोरीको जीबन चुंडेकाहरु र हजारौंका घर बमले उडाएकाहरु आज देशको मालिक भएर देश लुटिरहेका छन्, मनपरि गरिरहेका छन्, तिनीहरुलाई गर्नुस् न गाली नै गर्ने भए । मैले कस्को के बिगारेको छु र मेरो पछि लाग्नु पर्ने ?’
मैले बारबार भनेकी छु, नेतृत्व सहि भयो भने जुनसुकै ब्यबस्था पनि सफल हुन्छ । नेतृत्व गलत भयो भने ब्यबस्था जति राम्रो भए पनि परिवर्तन हुदैन, अस्तब्यस्त हुन्छ, हाहाकार हुन्छ, जुन अहिले देशमा भैरहेको छ । तसर्थ यो ब्यबस्थाका नक्कली ठेकेदारहरुबाट देशलाई निकाश दिन मैले असल नेताको नेतृत्व खोजेको हो र त्यो असल नेता राजेन्द्र लिङदेनलाई मैले गरेको सपोर्ट एकइन्च खेर जान दिने छैन । सकेसम्म राम्रै गर्ने कोशिस गर्ने छु । र आज जस्ले मेरो आलोचना गरिरहेका छन्, तिनीहरुलाई दुख परेको खण्डमा सबैभन्दा पहिला सहयोग गर्न पाईयोस् ।
