देशका केही स्थानमा हावा हुरीसहित हल्का वर्षाको सम्भावना

---

काठमाडौं। पश्चिमी न्यूनचापीय प्रणालीको प्रभावका कारण आज देशका केही स्थानमा हावा हुरीसहित हल्का वर्षाको सम्भावना रहेको छ ।

आज दिउँसो देशका पहाडी भू-भागमा आंशिक देखि सामान्य बदली रहे पनि अन्य भू-भागको मौसम सामान्यतः सफा रहने छ ।

प्रदेश १, बागमती, गण्डकी, कर्णाली र सुदूरपश्चिम प्रदेशका पहाडी भू-भागमा दिउँसो र साँझ हावाहुरी‚ चट्याङसहित हल्का वर्षा हुने मौसम पूर्वानुमान महाशाखाका मौसमविद् राजु प्रधानाङ्गले जानकारी दिए ।

त्यस्तै आज राति देशको पहाडी भू-भागमा सामान्यतः बदली र अन्य भू-भागमा मौसम सफा रहने छ भने प्रदेश १, गण्डकी प्रदेश, कर्णाली र सुदूरपश्चिम प्रदेशको पहाडी भू-भागका थोरै स्थानमा भने हल्का वर्षाको सम्भावना छ ।