भीमदत्त नगरपालिका विरुद्ध पत्रकार खेम भण्डारीले अख्तियारमा दिए उजुरी (बिज्ञप्ति सहित)

उजुरी दर्ता गराएपछि भण्डारीद्वारा जारी प्रेस विज्ञप्तिमा १० पुलको डिपिआर बनाउँदा प्रक्रिया नै मिचेर इन्जिनियरिङ परामर्शदाता कम्पनीको छनोट गरिएको र कानुनअनुसार डिपिआर स्वीकृत नहुँदै एक करोड रुपैयाँ भुक्तानी दिएर भ्रष्टाचार गरिएको दावी गरिएको छ ।

नगरपालिकाले वडा नं १९ को कालीखोला पुल–२, वडा नं ९ का क्रमशः कामीकाटे खोला पुल र गताडी खोला पुल, वडा नं. ३ को खनिया खोला पुल, वडा नं. १८ को भासी खोला पुल, वडा नं. १९ को कालीखोला पुल–१, वडा नं. १३ महाकाली नदी तटबन्ध भएर जाने खोलामा पुल, वडा नं. १० को तिलकेनी खोला पुल, वडा नं. ९ र १० बीचको खरिया खोला पुल तथा वडा नं. १५ को गोबरिया खोला पुलको एकसाथ डिपिआर बनाउने भन्दै कन्सल्टेन्सी कम्पनी छनोट गर्दा कानुन मिचेको भण्डारीको आरोप छ । साथै, नेपाल सरकार भौतिक योजना मन्त्रालय स्थानीय पूर्वाधार विकास विभागअन्तर्गतको सडक पुल शाखाबाट डिपिआर स्वीकृत नगराई मल्ल एण्ड ग्रुप इन्जिनिजयरिङ कन्सलटेन्सीलाई कानुन विपरीत एक करोड रुपैयाँ भुक्तानी दिइएको पनि उनले दावी गरेका छन् । छ । आफू स्वयं आयोगको महेन्द्रनगर कार्यालयमा उपस्थित भण्डारीले उजुरी दर्ता गराएका हुन् ।

निर्माण सम्पन्न भइसकेको वडा नं. १३ को पुलको समेत डिपिआर बनाएर भुक्तानी दिइएको भण्डारीको कथन छ । आयोगले तत्काल आफ्नो उजुरीमाथि कारवाही थाल्ने अपेक्षा पनि उनले विज्ञप्तिमार्फत जाहेर गरेका छन् ।