कञ्चनपुरमा बैंक बन्द, तरकारी फलफूल सातामा ३ दिनमात्र बेच्न पाइने

---

कंचनपुर-  जिल्ला प्रशासन कार्यालय कञ्चनपुरले निषेधाज्ञाको समयावधि थप कडाई गर्ने निर्णय गरेको छ । जिल्ला “कोभिड–१९ सङ्कट व्यवस्थापन समिति” को निर्णय अनुसार वैशाख २२ गते राति १२ बजेदेखि ३१ गते राति १२ बजेसम्म निषेधाज्ञा थप गरिएको हो ।
प्रमुख जिल्ला अधिकारी रामकुमार महतोका अनुसार बैंकका सबै शाखाहरू बन्द गर्ने र तरकारी एव‌ं फलफूल सातामा ३ दिनमात्र बेच्न पाइने नियम बनाइएको छ।

सोमबार कोभिड–१९ सङ्कट व्यवस्थापन समितिका संयोजक समेत रहेका महतोले स्वास्थ्य सेवा, दुग्ध, पेट्रोलियमसम्बन्धी व्यापार व्यवसायबाहेकका अन्य व्यवसाय सञ्चालन गर्नमा रोक लगाइएको जानकारी दिए । ‘एउटा एटीएम र चेकबुक लिएर यात्रा गर्ने, प्रहरीले समात्यो भने बैंक जान लागेको भन्ने बाहाना बनाउने धेरै भएपछि बैंक पनि बन्द गरिएको हो ।’ महतोले भने ‘तरकारी खरिदमा पनि त्यस्तै बाहाना बनाउने गरेको पाएपछि तरकारी, खाद्य, फलफूलका व्यवसाय हरेक आइतबार, मङ्गलबार र बिहीबार मात्रै सञ्चालन गर्न पाउने गरी निषेधाज्ञा थप गरिएको हो ।’

अति आबश्यक ढुवानीका साधनबाहेक अन्य सार्वजनिक तथा निजी सवारी साधन सञ्चालन समेत बन्द गर्ने निर्णय छ । सामाजिक दुरी र मास्क प्रयोग गरि राजस्व स‌ंकलन लगायतका सरकारी सेवा भने खुला रहने महतोले जानकारी दिए ।

सञ्चारकर्मीको हकमा नेपाल पत्रकार महासङ्घको सिफारिशमा प्रमुख जिल्ला अधिकारीबाट जारी भएको पासका आधारमा आवतजावत गर्न सकिने छ । विवाह तथा व्रतबन्धको लागि अनुमति तथा पास जारी गर्ने कार्य सम्बन्धित ‘क’ वर्गको इलाका प्रहरी कार्यालयले बढीमा १५ जनासम्म सहभागी भई जनस्वास्थ्य सुरक्षा मापदण्डको पूर्ण पालना हुने गरी अनुमति दिन सक्नेछ । अत्यावश्यक अवस्थामा नेपाल प्रवेश गर्न चाहने व्यक्तिले नेपाल सरकारद्वारा तोकिएको गड्डाचौकी र गौरीफन्टा नाकाबाट निर्धारित मापदण्ड पूरा गरी आवागमन गर्न सकिने व्यवस्था गरिएको छ ।

नेपाल प्रवेश गर्ने कञ्चनपुर जिल्लाको नागरिकको हकमा सम्बन्धित स्थानीय तहको समन्वयमा क्वारेन्टिन, आइसोलेसन बस्नुपर्ने तथा जिल्ला बाहिरका नागरिकको हकमा नाकामा रहेको हेल्थ डेस्कमा स्वास्थ्य परीक्षणपश्चात होल्डिङ सेन्टरबाट सम्बन्धित स्थानीय तहको समन्वयमा गन्तव्यमा पठाइने व्यवस्था मिलाइएको जानकारी छ।